Министерството за здравство соопшти дека трет ден по ред продолжува стабилизирањето на состојбата со гастроентеритис во Гостивар, при што е регистрирано значително намалување на бројот на новопрегледани пациенти.
Според податоците од јавните здравствени установи, во текот на вчерашниот ден во Општата болница „Д-р Ферид Мурад“ во Гостивар биле извршени вкупно 108 нови прегледи – 60 на Инфективното одделение, 37 на Педијатриското одделение и 11 во Ургентниот центар. На болничко лекување биле примени двајца нови пациенти на Инфективното одделение, додека на Педијатриското одделение немало нови хоспитализации.
Во Здравствениот дом Гостивар биле регистрирани 87 прегледи во дежурната служба и 17 повици до Итната медицинска помош.
Во меѓувреме, на Универзитетската клиника за инфективни болести и фебрилни состојби во Скопје биле извршени три нови прегледи на пациенти од Гостивар, при што едно лице било задржано на болничко лекување.
Министерот за здравство Сашо Клековски истакна дека бројките укажуваат на продолжување на позитивниот тренд.
„Во споредба со 20 јули, кога во Општата болница во Гостивар беа регистрирани 183 прегледи, вчера се евидентирани вкупно 108 прегледи, што претставува намалување од околу 41 отсто. Истовремено, бројот на прегледи во Здравствениот дом е намален од 110 на 87 пациенти, односно за околу 21 отсто, што дополнително ја потврдува позитивната насока на движење на бројките“, изјави Клековски.
Од Министерството за здравство посочуваат дека и понатаму внимателно ја следат состојбата и остануваат во координација со сите надлежни здравствени установи.
