Поранешниот министер за социјална политика, демографија и млади, Фатмир Бекир Лимани, преку објава на социјалните мрежи порача дека неговата мисија продолжува и дека функцијата не ја менува неговата посветеност кон граѓаните.
Во својата порака, Лимани истакнува дека функцијата е временска должност, додека обврската кон народот се гради со работа, карактер и резултати.
„Функцијата не е наследство, туку должност што трае до крајот на мандатот. Јас секогаш ја избирав работата во служба на народот и татковината, затоа што само таа остава трајна вредност“, наведува Лимани.
Тој додава дека во текот на мандатот бил изложен на критики и напади, но оценува дека тие се дел од политичкиот пат и нема да го поколебаат.
Во објавата се осврнува и на резултатите што, според него, биле постигнати за време на неговото раководење со Министерството. Посочува дека се реализирани над 1.300 вработувања во институциите под надлежност на Министерството, обезбедени се нови вработувања во детските градинки, зголемени се пензиите и платите на вработените во центрите за социјална работа, а започнати се и повеќе проекти за изградба и проширување на капацитетите на градинките низ државата.
Лимани истакнува и дека биле спроведени законски измени со кои се овозможува лиценцирање на директори, воспитувачи, негуватели и стручни работници и на албански јазик, како и издавање лиценци на албански јазик.
На крајот од обраќањето, тој порача дека останува посветен на младите и на граѓаните.
„Во животот, како и во политиката, има моменти кога некој мисли дека едно поглавје е завршено. Но, за оние што се навистина посветени, токму тогаш започнува ново поглавје. Продолжуваме со гордост, со започнатите и успешно реализирани дела“, напиша Лимани.
