На денешната прес-конференција, пратеникот на ВМРО-ДПМНЕ, Бране Петрушевски, изнесе обвинувања дека митото од 2.000 евра кое, според него, било наменето за поранешниот директор на Царинската управа, Стефан Богоев, претставувало само прва од неколкуте исплати поврзани со тендер вреден 18 милиони денари.
Петрушевски тврдеше дека, според информации добиени од свиркачи, комуникацијата за договорот била водена директно меѓу Богоев и Александар Спирковски – Џемо преку апликацијата Вибер.
Според него, Спирковски, кој ја застапувал фирмата што го добила тендерот за одржување на хигиена на граничните премини и терминали, договорил повеќе финансиски исплати за Богоев, при што една од наводните транши изнесувала над 110.000 денари.
„Јавноста заслужува да добие одговор колку пари требало да добие Стефан Богоев за да го намести овој тендер вреден 18 милиони денари“, изјави Петрушевски.
Во своето обраќање, тој упати критики и кон СДСМ, оценувајќи дека партијата е поврзана со, како што рече, криминал, афери, скандали, тендери и провизии.
Од СДСМ засега нема реакција на обвинувањата изнесени на прес-конференцијата.
