Митовски: Законот мора да важи за сите, но зошто контролите се толку чести во Крива Паланка?

Градоначалникот на Крива Паланка, Сашко Митовски, јавно реагираше на зачестените полициски и инспекциски контроли во градот, откако, како што наведува, локални дуќанџии, угостители и сопственици на автоплацеви му се пожалиле на постапките на надлежните служби.

Во објава на социјалните мрежи, Митовски посочува дека трговците од централната улица во последните месеци ретко поминувале без казна, додека сопствениците на автоплацеви велат дека речиси и да нема објект што не бил посетен од инспекција.

— реклама —

Тој нагласува дека трговијата со половни возила е еден од главните двигатели на локалната економија и дека од оваа дејност зависат бројни семејства, како и други поврзани бизниси.

— реклама —

— реклама —

Митовски пренесува и поплаки од угостителите, кои, според него, сведочат за контроли во кои учествувале и по триесетина полицајци и инспектори. Како пример го наведува петокот, кога, според информациите што ги добил, во градот пристигнале повеќе од шест возила на републичката сообраќајна полиција, распоредени на неколку локации.

Тој наведува и дека за време на викендот, при контрола во угостителски објект со повеќе од 300 гости, сопственикот бил приведен, а подоцна бил пуштен. Според Митовски, забавата во објектот истата вечер била прекината.

— реклама —

Градоначалникот нагласува дека законите мора да важат за сите и дека секој е должен да ги почитува, но јавно прашува дали со ист интензитет, бројност на службеници и начин на постапување се спроведуваат контролите и во скопските населби Чаир и Бит-пазар.

„Паланчани се мирни и кротки луѓе. Ќе помине и овој терор“, наведува Митовски, додавајќи дека за случувањата наскоро својот став ќе го кажат и жителите на Крива Паланка.