Млади музичари од светот ја снимаат музиката за филмот „Слушни ме“ за Слаткаристика, премиера на почетокот на 2027 година

Во студиото FAME’S во Скопје се снима оригиналната музика за документарниот филм „Слушни ме“, посветен на Марко Маринковиќ – Слаткаристика и неговото лично искуство со пелтечењето. Музиката, чиј најголем дел е дело на Лазар Цветковски, ја изведува оркестар составен од млади музичари од различни европски земји и пошироко.

На снимањето присуствувал и Слаткаристика, кој го следел процесот на создавање на музиката. Тој истакнал дека оркестарската изведба на неговите песни за него претставува посебно искуство.

— реклама —

„Пресреќен сум што имам можност своите песни да ги слушнам во една ваква оркестарска изведба. За мене ова е навистина посебен момент – музиката што е дел од мојата приказна добива нов живот, нова емоција и поинаква сила“, изјави Маринковиќ.

Снимањето се реализира преку соработката меѓу продукциската куќа на филмот и Институтот FAME’S, во рамките на проектот „Европски креативен оркестарски програм за квалификувани млади“. Проектот е поддржан од програмата „Креативна Европа“, Министерството за култура на Македонија и FAME’S ДОО.

— реклама —

Институтот FAME’S, основан во 2021 година, им овозможува на млади класични музичари од Европа да учествуваат на мастеркласови со реномирани музичари, ментори и диригенти. Преку Семинар 14 и курсот Hybrid Music Orchestral Course, учесниците добиваат можност да работат на вистинска филмска продукција и да стекнат практично искуство во професионално студиско снимање.

— реклама —

За потребите на проектот, FAME’S обезбедил студио, простории за проби, оркестар, диригент, тон-мајстор и техничка опрема. Од институтот посочуваат дека ваквите проекти им овозможуваат на младите музичари да ги запознаат сите фази од создавањето филмска музика – од подготовката на партитурите и оркестарските проби до финалното снимање.

„Особено ни е значајно што едно вакво светски признаено студио функционира во Скопје и што сме дел од создавањето на оригинална музика за македонски филм со силна општествена и инклузивна порака“, изјави Стефан Ношпал од FAME’S.

Филмот „Слушни ме“ го следи животниот пат на Слаткаристика, од несигурностите во детството до создавањето автентичен глас што денес инспирира многумина. Преку лични сведоштва, музика, работилници со деца и играни сцени од неговиот живот, филмот ги обработува темите на пелтечењето, прифаќањето на различностите, храброста, упорноста и моќта на уметноста.

Режисер на филмот е Раша Петровиќ, сценариото е на Кристина Ризоска, а делото е создадено според идеја и вистинита приказна на Марко Маринковиќ – Слаткаристика. Филмот е копродукција на ОХО Продукција и Иноватива Груп, а премиерата се очекува на почетокот на 2027 година.