Младиот математички талент Македон Димитровски постигна извонреден успех на Германската математичка олимпијада, освојувајќи два златни медали и се вброи меѓу најдобрите учесници на натпреварот.
Димитровски освои златен медал во индивидуалната конкуренција по математика, како и дополнително злато во рамките на математички предизвик. Благодарение на овие резултати, тој беше прогласен и за лауреат – признание кое им се доделува само на најуспешните натпреварувачи.
Успехот беше споделен на социјалните мрежи од неговиот татко Владимир Димитровски, кој изрази голема гордост и истакна дека станува збор за историски резултат.
„Со своите блескави резултати беше прогласен и во престижната група на лауреати – признание резервирано само за најдобрите од најдобрите“, наведе тој.
Овој успех претставува значајно признание не само за младиот математичар, туку и за Македонија, која повторно добива место на меѓународната научна сцена преку постигнувањата на своите млади таленти.
