МНР ќе ги информира ЕУ и Советот на Европа за приемот на Ива Михаилова во Бугарија

Министерството за надворешни работи и надворешна трговија реагира на приемот на Ива Михаилова на високо ниво во Софија, оценувајќи дека постапувањето на бугарските државни институции ги поткопува напорите за градење доверба и е спротивно на заложбите за добрососедски односи.

— реклама —

Од Министерството посочуваат дека приемот на лице против кое се води судска постапка испраќа погрешна порака. Според нив, националната припадност и поседувањето друго државјанство не смеат да претставуваат заштита од одговорност пред надлежните институции.

„Секој има право на правично судење. Никој нема право на изземање од законите“, наведуваат од МНР.

— реклама —

Од Бугарија, како членка на Европската Унија, се очекува да ги почитува основните европски принципи, меѓу кои се почитувањето на судските постапки, соработката меѓу надлежните институции и еднаквоста пред законот. Министерството оценува дека постапките што создаваат впечаток на институционална заштита од судска одговорност се спротивни на овие принципи.

— реклама —

МНР најавува дека за развојот на случајот ќе ги информира меѓународните партнери, особено институциите на Европската Унија и Советот на Европа. Од Министерството предупредуваат дека ваквите постапки, за кои, како што наведуваат, има и претходни примери, директно ја нарушуваат довербата меѓу двете држави и отвораат прашања за доследноста во почитувањето на заедничките европски вредности.

Од Министерството порачуваат дека остануваат посветени на развојот на добрососедските односи засновани врз меѓусебно почитување, доверба и европски принципи, при што очекуваат и бугарската страна да ја покаже истата одговорност.

„Почитувањето на правдата не е прашање на политички избор, туку основна европска обврска“, порачуваат од МНР.