Модриќ ќе игра за Хрватска и на 41 година, но не сите се воодушевени од одлуката

Лука Модриќ донел одлука и на 41-годишна возраст да продолжи да настапува за репрезентацијата на Хрватска, а според последните информации, тој ќе биде дел од списокот на новиот селектор, Славен Билиќ.

Сепак, одлуката не наиде на целосно одобрување во хрватската јавност. Новинарот на „Индекс“, Вице Карин, смета дека Модриќ треба да им го отстапи местото на помладите фудбалери.

— реклама —

Во својот текст со наслов „Ти благодариме на сè, но доста беше“, Карин оценува дека Модриќ повеќе не е играчот што беше во 2018 година, кога ја освои „Златната топка“ и беше еден од најважните фудбалери на Хрватска.

„Модриќ веќе не е оној од 2018 година. Тоа одамна веќе не е вест. Неговото знаење и фудбалскиот потег не се спорни, како ни фактот дека и понатаму може да биде корисен со ограничена минутажа, кога треба да се смири натпреварот или да креира гол. Но, веќе подолго време е далеку од својот врв во двете насоки“, пишува Карин.

— реклама —

Тој смета дека Модриќ повеќе не може да покрива голем простор во одбраната, додека со топката и понатаму е исклучително квалитетен, но физичките способности веќе не му се исти.

— реклама —

Карин упатува и критика до Билиќ, наведувајќи дека не треба развојот на новата Хрватска да го подредува на Модриќ, особено ако целта е создавање среден ред за иднината.

„Кочењето на развојот на некоја нова Хрватска, во која и овластувањата во тимот и структурата на средниот ред ќе бидат без Модриќ, е најлошиот потег што Билиќ може да го направи“, смета хрватскиот новинар.

Според него, дури и Модриќ да успее повторно да игра на врвно ниво, тоа би било краткорочно решение, бидејќи на Европското првенство би имал 42 години.

„Беше прекрасно и беше за паметење. Но, доста е“, заклучува Карин.