Речиси два милиони луѓе се евакуирани во источна Кина откако силниот тајфун Бави стигна до копното, предизвикувајќи прекин на наставата, откажување на стотици летови и сериозни нарушувања во сообраќајот.
Според кинеските власти, тајфунот во саботата навечер прво го погоди крајбрежјето кај градот Тајџоу, а неколку часа подоцна вторпат удри во областа Венџоу. Во провинцијата Жеџијанг се евакуирани повеќе од 1,7 милиони луѓе, додека илјадници жители се евакуирани и во соседните провинции.
Во погодените подрачја се суспендирани наставата, работата и сите активности на отворено, откажани се околу 400 летови и десетици железнички линии. Венџоу, град со околу 10 милиони жители, се најде директно на патот на невремето.
Иако Бави во меѓувреме ослабна од супертaјфун во силна тропска бура, метеоролозите предупредуваат дека и натаму претставува опасност поради огромната количина дожд што ја носи. Се очекува постепено да слабее додека се движи кон северозападниот дел на Кина.
Пред да стигне до Кина, Бави ги зафати јапонските острови и Тајван, каде илјадници домаќинства останаа без електрична енергија, а обилните врнежи создадоа опасност од свлечишта. На Филипините, пак, свлечишта поврзани со невремето однесоа најмалку 17 човечки животи.
Тајфунот првично се формираше како супертaјфун над Пацификот, со ветрови до 290 километри на час, пред постепено да ослаби додека се движеше кон источна Азија.
