Москва повторно отвора извоз на дизел, првично ќе испорача 500.000 тони на светскиот пазар

Русија делумно ја укина забраната за извоз на дизел, овозможувајќи повторно испорачување на горивото на светскиот пазар. Одлуката стапи во сила на 10 октомври и, според руската влада, е поврзана со договорот меѓу рускиот претседател Владимир Путин и американскиот претседател Доналд Трамп.

— реклама —

Во почетната фаза ќе бидат овозможени испораки на 500.000 тони дизел, соопшти руската влада, а пренесе новинската агенција ТАСС. Руските нафтени компании веднаш ќе започнат со договарање испораки со странски партнери, во координација со владата.

Вицепремиерот Александар Новак изјави дека одлуката нема да ги загрози домашните потрошувачи, бидејќи рускиот пазар е снабден со доволни количества гориво.

— реклама —

Според најавениот план, Русија во октомври би испорачала 300.000 тони дизел, во ноември количината би се зголемила на 500.000 тони, а во декември на еден милион тони. Во наредниот период месечниот извоз би можел да достигне и три милиони тони.

— реклама —

Во меѓувреме, американската влада издаде општа дозвола за испорака на руски дизел на светските пазари до 7 април 2027 година.

Претходно, Москва најавуваше дека ќе размисли за делумно ублажување на забраната доколку производството го надмине домашното барање. Сепак, кон крајот на септември, портпаролот на Кремљ, Дмитриј Песков, порача дека евентуалното укинување на ограничувањата ќе зависи и од укинувањето на санкциите за увоз на руски енергенси, како и од гаранциите за безбедност на пловидбата во Црното Море.

Пред воведувањето на ограничувањата, Русија беше втор најголем извозник на дизел во светот, зад Соединетите Американски Држави.