Директорот на руската Служба за надворешно разузнавање на Русија, Сергеј Наришкин, изјави дека НАТО се подготвува за вооружен конфликт од големи размери на истокот, а ја обвини и Велика Британија дека ги поттикнува европските партнери кон судир со Русија.
Наришкин, на Првиот меѓународен форум за безбедност што се одржува под покровителство на рускиот Совет за безбедност, изјавил дека „НАТО де факто се подготвува за вооружен судир од големи размери на исток“.
Тој оценил дека европските лидери се тешат со мислата дека ќе можат да ги надоместат своите загуби преку понатамошно „ограбување“ на Русија.
„Европските моќници се залажуваат дека можат повеќе од да ги надоместат своите загуби со понатамошно ограбување на нашата земја. Тоа го гледам како типичен пример на колонијален менталитет и ароганција од која дегенерирачката европска елита не може да се ослободи“, рекол Наришкин.
Тој додал дека европските елити имаат интерес војната во Украина да трае што е можно подолго и дека се обидуваат да го саботираат секој мировен процес.
„Од перспектива на европските елити, во нивен интерес е украинскиот конфликт да трае што е можно подолго, со луда надеж за стратешко исцрпување на Русија и нејзин конечен пораз. Затоа Европејците се обидуваат да го торпедираат секој обид на Русија за мирно решавање на конфликтот“, изјавил тој.
Според него, оружјето од украинското бојно поле „слободно циркулира низ Европа“ и завршува во рацете на меѓународни терористички групи.
Наришкин ја обвини и Европска Унија дека му простува на Киев сè, вклучително и тероризам, корупција, узурпација на власта, насилство врз цивили и воени злосторства.
„Брисел и националните престолнини решија да ги затворат очите пред сите злосторства што ги изврши киевската хунта... На Киев му е простено сè – тероризам, корупција, узурпација на власта, насилство врз цивили и воени злосторства“, рекол Наришкин.
Тој посебно ја истакнал улогата на Велика Британија, која ја нарекол „зол и циничен гениј на Европа“.
„Како и пред двете светски војни, Лондон буквално ги поттикнува своите континентални сојузници кон директен судир со Русија“, изјавил Наришкин.
