Во Хрватска, полицијата поднела обвинителен предлог против 18-годишен мотоциклист, кој, според полицијата, покажал среден прст кон стационарна камера за мерење брзина во Бјеловар.
Младиот мотоциклист во април годинава поминувал со моторот покрај мерниот уред на улицата „Петар Бишкуп Вене“, кога ја кренал левата рака и кон камерата го покажал средниот прст. Според неофицијалните информации, во моментот на настанот тој сè уште бил малолетен.
Хрватската полиција смета дека со овој гест ги навредувал и омаловажувал службените лица додека ја извршувале службената должност. По завршената постапка, полицијата утврдила дека сторил прекршок против јавниот ред и мир.
Според неофицијални информации, за прекршокот е предвидена глоба од 700 до 4.000 евра, а полицијата ќе предложи казна од 700 евра. Обвинителниот предлог е доставен до Општинскиот суд во Бјеловар.
