Мртва ајкула од четири метри пронајдена на плажа во Италија

Голема ајкула долга околу четири метри и тешка приближно 400 килограми е пронајдена мртва на плажа во близина на Фолоника, во италијанската област Тоскана. Причината за нејзината смрт засега останува непозната.

— реклама —

Според италијанските медиуми, станува збор за ајкула со шест жабри – редок вид кој многу ретко се среќава во Средоземното Море. Животното било забележано на дел од јавната плажа позната како „Тониева плажа“, но веќе било мртво кога било пронајдено.

— реклама —

По пронаоѓањето, ајкулата била пренесена во пристаништето Пунтоне ди Скарлино, каде што најпрво била извлечена на копно, а потоа повторно вратена во морето за да се забави процесот на распаѓање.

— реклама —

Во наредните денови стручен тим, предводен од професорот Примо Микарели, ќе изврши обдукција и дополнителни анализи за да се утврди точната причина за угинувањето. Меѓу можните причини се споменуваат природни заболувања или други фактори, кои ќе бидат познати по завршувањето на испитувањата.

Научниците посочуваат дека овој редок примерок претставува значајна можност за истражување на биологијата на ајкулите со шест жабри и нивното присуство во Средоземното Море.