Мртвиот гавран со западнонилска треска во Ресен е аларм за локална циркулација

Присуството на вирусот на западнонилска треска е потврдено и кај мртов гавран пронајден во Ресен, со што ова е втор регистриран случај кај угината птица во земјава. Претходно вирусот беше потврден кај мртов гавран пронајден во централното подрачје на Скопје, во близина на Вардар.

— реклама —

Министерот за здравство Сашо Клековски оцени дека наодот во Ресен е показател за локална циркулација на вирусот, имајќи предвид дека гавраните главно се стационарни птици и не спаѓаат во преселните видови.

„Агенцијата за храна и ветеринарство го потврди мртвиот гавран со вирус на западнонилска треска во Ресен, во централното подрачје, во паркот покрај општината. Гавранот е генерално стационарна птица, значи не е птица преселница, и пронаоѓањето на мртвиот гавран е показател на локална циркулација на вирусот на западнонилска треска“, изјави Клековски.

— реклама —

По потврдениот наод, веднаш биле известени Центарот за јавно здравје Битола и градоначалникот на Општина Ресен. Министерот очекува локалните надлежни служби да ги преиспитаат плановите за третирање против комарци и, доколку има индикација, да започнат со прскање.

— реклама —

На интернет-страницата healthalert.mk, каде што се објавуваат податоци за регистрираните случаи на западнонилска треска, засега нема пријавен случај на заразено лице од Ресен.

Во меѓувреме, Агенцијата за храна и ветеринарство го засили надзорот на целата територија на државата со цел да се утврди состојбата со западнонилската треска кај птиците. Се земаат примероци за лабораториско испитување, а надзорот опфаќа различни видови домашни и диви птици, меѓу кои кокошки, мисирки, фазани, еребици, гуски, пајки, лебеди, штркови, чапји, соколи, галеби, страчки, бувови, корморани и јастреби.

— реклама —

Надлежните апелираат до граѓаните да пријавуваат поголем број угинати диви птици забележани на исто подрачје во краток временски период, особено ако станува збор за гаврани или други диви преселни птици.