Муцунски и Петрова-Чамова ќе имаат билатерална средба во Софија

Министрите за надворешни работи на Македонија и Бугарија, Тимчо Муцунски и Велислава Петрова-Чамова, во четврток ќе имаат можност за билатерална средба во Софија, на маргините на меѓународната министерска конференција посветена на Коридорот 8.

Од бугарското Министерство за надворешни работи за БТА потврдиле дека на 8 октомври во Софија ќе се одржи конференцијата, чиј домаќин ќе биде Петрова-Чамова, а на која ќе присуствува и Муцунски.

— реклама —

„Во рамките на форумот, на кој ќе присуствува и министерот за надворешни работи на Република Северна Македонија, Тимчо Муцунски, ќе има можност да се одржи билатерална средба, што е дел од редовниот дијалог меѓу двете земји“, соопштиле од бугарското МНР.

Од македонското Министерство за надворешни работи и надворешна трговија засега нема официјална потврда дека бугарската страна го прифатила барањето за средба, иако Софија најавува можност за билатерален состанок.

Иницијативата за средбата уследи по минатонеделната посета на претседателката на Европската комисија, Урсула фон дер Лајен. Премиерот Христијан Мицкоски тогаш соопшти дека ќе го послуша нејзиниот совет и ќе побара од Муцунски да испрати дипломатска нота до Софија за средба со Петрова-Чамова.

— реклама —

Од македонското МНР во петокот потврдија дека барањето е испратено. Мицкоски денеска изјави дека сè уште нема официјален одговор, додавајќи дека Владата ќе може да излезе со подетален коментар откако ќе пристигне.

Бугарската претседателка Илијана Јотова во саботата изјави дека Бугарија е отворена за разговори, но без ултиматуми и без отстапување од европската политика. Таа посочи и дека е умерен оптимист и дека ќе побара од Петрова-Чамова да го види барањето за средба во Софија.

— реклама —

Муцунски и Петрова-Чамова последен пат билатерално се сретнаа во мај годинава, на маргините на министерскиот состанок на НАТО во Хелсинборг, Шведска. Тогаш двете страни останаа на своите веќе познати позиции.

Муцунски тогаш посочи дека е потребно решение на билатералното прашање кое го попречува процесот на отворање на преговорите со Европската Унија, нагласувајќи дека прашањата поврзани со македонскиот јазик, идентитет, култура и историја не можат да бидат предмет на разговори.

Од бугарска страна беше повторен ставот дека спроведувањето на преземените обврски во рамките на Европскиот консензус од јули 2022 година е услов за напредок на Македонија кон Европската Унија.

Во јуни во Софија престојуваше и претседателката Гордана Сиљановска-Давкова, која се сретна со бугарската претседателка Јотова на маргините на Самитот на Процесот за соработка во Југоисточна Европа. И од оваа средба не произлезе конкретен напредок во надминувањето на спорот.

Фон дер Лајен по средбата со Мицкоски во Скопје рече дека првиот чекор треба да биде направен оваа недела, со обид за деблокада на процесот и воспоставување на дијалог.