Муцунски: Нема гаранции за решение со Бугарија, нема да прифатиме привремена санација

Словачка се противи на двојните стандарди во пристапот на Европската Унија кон земјите-кандидати и бара јасна потврда дека членството е реална можност за Западен Балкан. Ова го порача словачкиот министер за надворешни и европски прашања, Јурај Бланар, при денешната официјална посета на Македонија.

— реклама —

Бланар се повика на Солунскиот самит и декларацијата од 2003 година, оценувајќи дека договореното за европската перспектива на регионот не се спроведува. Тој предупреди дека растечката разочараност кај земјите-кандидати може да доведе до губење на влијанието на ЕУ во регионот и нагласи дека Словачка силно ја поддржува Македонија на патот кон членство.

— реклама —

Словачкиот министер предложи и средба во Македонија во рамките на таканаречениот Славков формат, кој ги обединува Словачка, Чешка и Австрија, на која би се разговарало за евроинтеграциите. Тој се заложи за поширока и посилна Европска Унија, во која членството ќе зависи од подготвеноста на земјите, а не од различни критериуми за различни региони.

— реклама —

Шефот на македонската дипломатија, Тимчо Муцунски, изјави дека Владата продолжува да комуницира со европските институции и со земјите-членки што се подготвени да помогнат во изнаоѓањето одржливо решение со Бугарија. Сепак, тој нагласи дека нема гаранции дека такво решение ќе биде постигнато и дека Владата нема да прифати привремено решение што долгорочно би ја довело државата во истата ситуација.

Муцунски најави дека разговорите со официјална Софија ќе продолжат по завршувањето на изборите во Бугарија. Тој се осврна и на средбата со францускиот министер за Европа, Бенжамин Хадад, одржана минатата недела во Црна Гора, повторувајќи дека Македонија нема друга алтернатива освен европската интеграција.