Муцунски од Киев: „Стоиме со Украина, границите не можат да се менуваат со сила“

Министерот за надворешни работи и надворешна трговија, Тимчо Муцунски, денеска престојуваше во еднодневна официјална посета на Киев, Украина, каде што разговарал со украинскиот министер за надворешни работи, Андриј Сибиха.

Муцунски на социјалните мрежи објави дека до Киев патувал повеќе од 20 часа, со авион, воз и автомобил, оценувајќи ја посетата како една од организациски најсложените, но и најзначајните.

— реклама —

На средбите било разговарано за натамошно продлабочување на политичкиот дијалог и билатералната соработка, европската перспектива на Украина, како и за актуелните безбедносни предизвици.

Муцунски ја потврдил поддршката од Македонија за Украина и за почитувањето на принципите на суверенитет, територијален интегритет и меѓународното право.

— реклама —

— реклама —

„Стоиме со Украина. Украина е суверена држава. Нејзиниот територијален интегритет мора да се почитува. Границите не можат да се менуваат со сила“, напиша Муцунски.

Тој порача дека безбедноста на Украина е дел од европската безбедност и дека американското лидерство и европската одговорност треба да дејствуваат заедно за создавање услови за праведен и траен мир.

Муцунски посочи и дека поддршката од Македонија ќе продолжи, а кога ќе започне обновата на Украина, земјата сака да учествува не само како пријател, туку и како партнер во процесот на закрепнување и реконструкција.