Муцунски: Стратешкото партнерство со САД носи конкретни политички и економски резултати

Стратешкото партнерство со Соединетите Американски Држави во изминатиот период е дополнително засилено, а политичкиот дијалог со Вашингтон носи и конкретни економски резултати, оцени министерот за надворешни работи и надворешна трговија Тимчо Муцунски во гостувањето во емисијата „Тема на денот“ на Сител.

Муцунски, осврнувајќи се на работната посета на САД и учеството на Генералното собрание на Обединетите нации, посочи дека зголемениот ангажман се гледа преку средбите со претставници на американската администрација, Конгресот, како и со претставници на финансиски организации од јавниот и приватниот сектор.

„Фактите говорат за себе. И интензитетот, и содржината, и пораките што се пренесуваат, кои обезбедуваат клучните инвестиции, како оние за кои зборуваме, да се насочат кон стратешките сектори“, истакна Муцунски.

— реклама —

Говорејќи за односите со американскиот државен секретар Марко Рубио, тој нагласи дека во изминатиот период е воспоставена интензивна комуникација заснована на доверба и заеднички приоритети.

„Стратешкиот однос со САД е еден од постулатите на нашата надворешна политика и моето очекување е дека интензитетот на таа соработка ќе продолжи“, порача Муцунски.

— реклама —

Министерот посебно ја истакна економската димензија на партнерството, наведувајќи дека зголемениот политички дијалог е проследен со поголема трговска размена и извоз кон американскиот пазар.

Според него, соработката создава услови за зачувување на работните места, зголемување на капацитетите и нови инвестиции во извозно ориентираните компании.

„Можеме да зборуваме за сериозен скок на трговската размена и зголемен извоз кон Соединетите Американски Држави“, рече Муцунски, додавајќи дека Македонија била меѓу првите земји во Европа што имала заедничка изјава со САД во областа на трговијата.

— реклама —

Муцунски информираше и за тековната соработка со DFC и разговорите за неколку потенцијални нови инвестиции со поддршка од американската страна. Во тој контекст го посочи и пристапот „Trade Over Aid“, предводен од САД, кој е насочен кон стратешки инвестиции со земјите партнери.

Осврнувајќи се на критиките од опозицијата во врска со учеството на државната делегација на Генералното собрание на ОН, Муцунски ги отфрли како неточни тврдењата дека премиерот Христијан Мицкоски и неговата сопруга не присуствувале на приемот организиран од американскиот претседател.

„Претседателот на Владата, премиерот Христијан Мицкоски, заедно со неговата сопруга, беа поканети и присуствуваа на приемот организиран од претседателот Трамп и неговата сопруга Меланија“, изјави Муцунски.

Тој ги отфрли и тврдењата дека државната делегација броела 50 лица, посочувајќи дека нејзиниот обем и формат не отстапувале од практиката од претходните години.

Муцунски нагласи дека фокусот останува на натамошно продлабочување на стратешкото партнерство со САД и претворање на политичкиот дијалог во инвестиции, економски можности и резултати за граѓаните.