МВР нема евиденција дека Ива Михаилова ја напуштила Македонија, иако нејзиниот адвокат тврди дека поминале преку граница

Министерството за внатрешни работи, во одговор на прашања од „Скопје1“, соопшти дека во системот за гранична контрола нема евидентиран излез од Македонија за Ива Михаилова, која, според нејзините изјави за бугарската телевизија НОВА, веќе се наоѓа во Бугарија. Одговорот на МВР отвора прашања за начинот на кој Михаилова ја напуштила државата, особено откако нејзиниот адвокат тврдеше дека заедно поминале преку официјален граничен премин и дека македонските службеници знаеле за кого станува збор.

„Во однос на лицето за кое прашувате, Ве известуваме дека се извршени проверки во системот за гранична контрола на Министерството за внатрешни работи, при што е утврдено дека за наведеното лице нема евидентиран излез од територијата на Македонија“, одговорија од МВР за „Скопје1“.

Овој одговор е спротивен на тврдењата што адвокатот на Михаилова ги изнесе во интервју за бугарската телевизија НОВА, каде што објаснуваше како ја преминале границата.

— реклама —

„Преку граничен премин поминавме. Ги извадивме документите и поминавме. Луѓето од македонска страна добро знаеја дека е Ива Михаилова. Никој ништо не кажа. Разговаравме и тргнавме“, изјави адвокатот.

Михаилова, пак, во истото телевизиско интервју не даде конкретен одговор кога планира да се врати во Македонија.

— реклама —

„Не можам да кажам колку ќе останам во Бугарија“, рече таа, а на прашањето дали планира да се врати одговори: „Тоа ќе го процениме понатаму“.

Нејзиниот адвокат изјави дека ќе останат во Бугарија додека тоа го сметаат за потребно лекарите, но и додека Михаилова не се чувствува сигурна дека нема да биде малтретирана поради нејзиното бугарско национално изјаснување.

„Ќе останеме тука додека е потребно, додека кажат докторите. И додека таа не се чувствува сигурна дека нема да биде малтретирана дека е Бугарка во Македонија“, изјави адвокатот

— реклама —

„Скопје1“ побара одговори и од претседателот на Основниот суд Кочани, Спиро Борисов, имајќи предвид дека Михаилова е обвинета во судска постапка за сообраќајна несреќа со смртни последици.

До Борисов беа упатени прашања дали во моментов за Михаилова се определени мерки за обезбедување присуство, кои се тие мерки, дали судот има сознанија каде се наоѓа обвинетата и дали легално ја напуштила територијата на Македонија.

— реклама —

Претседателот на кочанскиот суд не одговори на поставените прашања.

Засега останува неразјаснето како Михаилова се нашла во Бугарија доколку, како што официјално соопштува МВР, во системот за гранична контрола не постои евиденција дека ја напуштила Македонија. Одговорот на Министерството сам по себе не утврдува дали станува збор за преминување надвор од граничен премин, пропуст во евиденцијата или други околности.

Не е познато ниту дали судот определил мерки што би го ограничиле нејзиното патување, ниту дали надлежните институции преземаат дополнителни проверки по информациите за нејзиното заминување.