Министерството за внатрешни работи ги потврди информациите за полициската акција во Гостивар, соопштувајќи дека три лица се лишени од слобода во рамки на предистражната постапка за загадувањето на водата во градскиот водовод.
Според МВР, полициски службеници од Полициската станица Гостивар, во координација со Основното јавно обвинителство Гостивар, ги привеле лицата поради сомневања поврзани со загадувањето на водата за пиење.
„Полициски службеници од ПС Гостивар во координација со Основното јавно обвинителство Гостивар лишија од слобода три лица во врска со сомненијата за загадување на водата во гостиварскиот водовод“, соопшти МВР.
Од слобода се лишени А.А. од селото Здуње, вршител на должност директор на ЈП „Комуналец“ – Гостивар, В.Д. од селото Форино, раководител на секторот „Водовод и канализација“, како и Л.Н. од селото Вруток, технички директор на јавното претпријатие.
Од Министерството информираат дека постапката сè уште е во предистражна фаза и дека во координација со Обвинителството продолжуваат активностите за обезбедување докази.
„Надлежните институции продолжуваат да преземаат дејствија за прибирање докази во предистражна постапка“, наведуваат од МВР.
Приведувањата следуваат по прогласената епидемија во Гостивар, при која повеќе од 3.100 граѓани побараа медицинска помош поради симптоми на гастроентеритис, а надлежните институции сè уште ја утврдуваат точната причина за загадувањето на водата и евентуалната кривична одговорност.
