Сообраќајот на државните патишта се одвива непречено и по суви коловози, но интензитетот на сообраќајот надвор од градските средини е зголемен, информира АМСМ.
На граничниот премин Богородица, за излез од државата, времето на чекање е околу 45 минути. На останатите гранични премини, од македонска страна, нема подолги задржувања за влез и излез од државата.
АМСМ апелира возачите да ја приспособат брзината на условите на патот, да ја почитуваат сообраќајната сигнализација и да бидат особено внимателни на делниците низ котлини, речни долини и клисури, каде постои можност за одрони.
Посебно внимание се препорачува на патните правци Катланово – Велес, Маврово – Дебар – Струга, Виница – Берово и Кочани – Делчево.
Во периодот од 17 август до 1 октомври, поради санација на косина на автопатот А4, на делницата Миладиновци – Свети Николе – Штип, кај наплатната станица Преод, е воведен изменет режим на сообраќај пред наплатната станица.
Патниот правец Охрид – Ресен преку Националниот парк Галичица е отворен за сообраќај за сите видови возила до 3,5 тони.
Во сила е и летниот режим за тешки товарни возила. Од 1 јули до 31 август, на државните патишта е забрането движење на тешки товарни возила со вкупна маса над 15 тони за време на викендите и во денови со екстремно високи температури.
