На 23 јуни 2001 година, за време на акцијата за ослободување на скопското село Арачиново, животот го загуби припадникот на Посебната единица на полицијата, Атанас Јанев од Струмица, кој остана запаметен како еден од бранителите што доброволно застанаа во првите борбени редови.
Атанас Јанев е роден на 23 август 1976 година во Струмица, а неговото семејство потекнува од селото Мокриево. Уште од најрана возраст покажувал силен интерес за историјата и минатото на македонскиот народ, негувајќи изразен патриотски дух и голема почит кон делото на македонските револуционери, особено кон Гоце Делчев.
По полнолетството, Јанев ја остварил својата желба да ѝ служи на државата и се вработил во Министерството за внатрешни работи, каде што брзо напредувал и станал припадник на Посебната единица на полицијата во Струмица.
Со почетокот на конфликтот во 2001 година, Атанас доброволно се пријавил за учество во борбените задачи. Во акцијата за ослободување на Арачиново тој бил меѓу припадниците кои се пријавиле да дејствуваат во првите борбени редови.
Само неколку месеци пред да загине, во декември 2000 година, Атанас стапил во брак. Неговата сопруга во тој период била бремена со нивното прво дете. Тој, како и неговиот соборец Никола Пехчевски од Берово, не успеал да го дочека раѓањето на своето дете. Денес, неговиот син го носи името Атанас, продолжувајќи го споменот за својот татко.
Атанас Јанев останува запаметен како еден од бранителите кои го положија својот живот во одбрана на државата за време на конфликтот во 2001 година.
