На денешната 98. пленарна седница на Собранието се разгледуваат законските измени за укинување на техничката влада, како и Предлог-законот за изменување и дополнување на Законот за пратениците, со кој се предлага тие да имаат само едно државјанство.
Заменик-министерот за јавна администрација, Лазе Јаќимоски, во образложението истакна дека техничката влада била воведена како привремено решение во услови на политичка криза, со цел да се обезбеди консензус за спроведување избори. Моделот произлегол од политичките договори во 2015 година и првпат бил применет на изборите во 2016 година.
Тој појасни дека предложените измени предвидуваат одложена примена, со цел да се обезбедат стабилност, правна сигурност и заштита на јавниот интерес. Според него, решението треба да овозможи рационално користење на јавните финансии, зајакнување на институциите и обезбедување демократски легитимитет на Владата.
Предлогот предвидува техничката влада да функционира до објавување на конечните изборни резултати по првите наредни парламентарни избори по стапување во сила на законот, по што ќе се создадат услови за нејзино укинување.
Јаќимоски додаде дека со измените се воспоставува постабилна и предвидлива правна рамка за спроведување на фер и транспарентни избори преку институциите утврдени со Уставот и законите.
На седницата пратениците ќе расправаат и за повеќе други законски предлози, меѓу кои измени на законите за минерални суровини, концесии и јавно-приватно партнерство, јавни претпријатија и внатрешна пловидба, сите по скратена постапка.
