Претседателката на Либерално-демократската партија (ЛДП) и пратеничка во Собранието, Моника Зајкова, смета дека во услови на раст на инфлацијата и влошена економска состојба, разговорите за нови избори се неоправдани и претставуваат дополнителен товар за граѓаните.
Таа посочи дека државата се соочува со раст на цените и зголемени трошоци за живот, поради што, според неа, фокусот треба да биде ставен на подобрување на животниот стандард, а не на организирање нов изборен процес.
„Сакам само да упатам една порака до граѓаните дека ако платата не им стигнува до крајот на месецот, ако пензиите не им стигнуваат до крајот на месецот, банките уште ги ‘шурат’ со провизии, да знаат дека новите избори значат повторно трошење пари од нивниот џеб“, изјави Зајкова.
Таа оцени дека е нелогично да се бараат нови избори во ситуација кога владејачкото мнозинство во Собранието располага со речиси двотретинска поддршка и има можност непречено да носи одлуки и закони.
Според Зајкова, граѓаните се уморни од честите изборни циклуси и не гледаат суштински промени од едни до други избори.
„На луѓето навистина им е преку глава од избори бидејќи гледаме дека од изборен циклус во изборен циклус ништо не се менува, државата осиромашува, институциите стануваат нефункционални“, рече таа.
Претседателката на ЛДП порача дека мандатот од четири години треба да се искористи целосно за спроведување политики во интерес на граѓаните, наместо за нови политички пресметки и изборни кампањи.
„Не сметам дека треба дополнително да ги изложуваме граѓаните на трошоци. Тоа ќе значи помалку пари во државниот буџет, затоа што ќе се потрошат на избори и ќе нема пари за да пораснат платите и пензиите“, заклучи Зајкова.
