ФИФА донесе контроверзна одлука да ја укине суспензијата на американскиот репрезентативец Фоларин Балогун, овозможувајќи му настап во осминафиналниот дуел против Белгија, иако претходно доби директен црвен картон.
Според светските медиуми, одлуката следувала по наводна интервенција на американскиот претседател Доналд Трамп, кој, според информациите, неколкупати телефонски разговарал со претседателот на ФИФА, Џани Инфантино, барајќи да се преиспита казната изречена по натпреварот против Босна и Херцеговина.
Според „Гардијан“, Трамп во период од четири дена трипати контактирал со Инфантино, а „Ројтерс“ оценува дека случајот отвора сериозна дебата за влијанието на политиката врз одлуките во светскиот фудбал.
ФИФА соопшти дека, согласно член 27 од Дисциплинскиот правилник, извршувањето на суспензијата е условно одложено за период од една година. Тоа значи дека црвениот картон останува во сила, но Балогун нема да ја пропушти следната средба. Доколку во текот на условниот период направи сличен прекршок, суспензијата автоматски ќе биде активирана.
Одлуката предизвика жестока реакција кај Кралската белгиска фудбалска федерација, која соопшти дека е „запрепастена“ од потегот на ФИФА и најави дека ќе ги разгледа сите правни можности за заштита на фер-плејот.
Белгискиот сојуз потсетува дека член 66.4 од Дисциплинскиот правилник јасно предвидува автоматска суспензија за следниот натпревар по директен црвен картон и оценува дека донесената одлука е спротивна и на правилата за Светското првенство 2026.
Осминафиналниот натпревар меѓу САД и Белгија е закажан за понеделник во Сиетл.
