Над 134 илјади нерешени предмети во судовите, само 13 основани претставки до Судскиот совет

Вкупно 134.610 предмети останале нерешени во судовите во Македонија на крајот на 2025 година. Во истиот период, од 425 претставки на граѓани разгледани од Судскиот совет, само 13 биле оценети како основани. Податоците се дел од годишните извештаи што денеска ќе бидат разгледани на седницата на собраниската Комисија за политички систем и односи меѓу заедниците.

— реклама —

Пред пратениците ќе бидат презентирани и извештајот за работата на Судскиот совет и извештајот за реализацијата и трошењето на средствата од судскиот буџет во текот на минатата година.

Во 2025 година биле поднесени 90 нови барања за поведување постапка за утврдување одговорност, кои се однесувале на вкупно 161 судија. За секое барање бил оформен посебен предмет, а за негово разгледување била задолжена тричлена комисија составена од членови на Советот избрани по пат на ждрепка.

— реклама —

Од вкупно 425 претставки по кои постапувал Судскиот совет, најголемиот дел се однесувале на незадоволство од донесените судски одлуки. Граѓаните пријавувале и одолговлекување на постапките, како и непочитување на законските рокови за преземање процесни дејствија.

— реклама —

На почетокот на годината судовите имале 134.729 нерешени предмети, а во текот на 2025 година пристигнале уште 540.122. Така, вкупниот број предмети по кои се постапувало достигнал 674.851.

До крајот на годината биле решени 540.241 предмет, додека 134.610 останале нерешени. Во евиденцијата биле забележани и 217 погрешно заведени предмети.

Извештаите за работата на Судскиот совет и за трошењето на средствата од судскиот буџет ќе бидат разгледани од надлежната собраниска комисија.