Здружението на судии бара одмрзнување на платите и нови вработувања во судовите

Здружение на судии на Република Македонија побара итно одмрзнување на платите на судиите, зголемување на примањата на судската администрација и распишување огласи за нови вработувања во судовите, со цел, како што наведуваат, обезбедување ефикасно и независно функционирање на судскиот систем.

Здружението информира дека до Уставен суд на Република Северна Македонија поднело дополнување на иницијативата за оценување на уставноста и законитоста на измените на Законот за плати на судиите, при што се опфатени и последните измени донесени на 25 февруари 2026 година. Со иницијативата се бара поништување, односно укинување на измените со кои, според Здружението, платите на судиите остануваат замрзнати веќе трета година по ред.

Во соопштението се оценува дека начинот на донесување на измените бил брз и неуставен, со популистички карактер, и дека тоа има далекусежни последици врз владеењето на правото. Според Здружението, ваквиот пристап е во спротивност со член 32 од Уставот и директно го нарушува достоинството на судиската функција.

Судиите посочуваат дека пратениците треба да престанат со носење законски решенија што, како што велат, имаат за цел купување социјален и политички мир, наместо да се насочат кон обезбедување независно и непристрасно судство како гарант на владеењето на правото и предуслов за европски напредок на земјата.

Во соопштението се наведува дека, по зголемувањето на функционерските плати од 78 проценти, платите на судиите во прв степен достигнале просечно околу 86.000 денари, а без тоа зголемување би изнесувале околу 50.000 денари. Дополнителен проблем, според Здружението, претставуваат ниските примања и одливот на кадар од судската администрација, како и неисплаќањето на додатоците, што, како што наведуваат, директно се одразува врз граѓаните како странки во постапките.

Здружението предупредува дека доколку продолжи, како што го нарекуваат, „уривањето“ на судскиот систем и доколку измените останат во сила, судиите ќе разгледаат други форми на изразување незадоволство и видлив протест, при што ја поддржуваат и судската администрација во преземање законски чекори за изразување на незадоволство.

— реклама —