Повеќе од 1700 патници и членови на екипажот се задржани на крузер кој се наоѓа во францускиот град Бордо, по смрт на еден патник и сомнеж за појава на норовирус.
Француските власти денеска издадоа наредба бродот да остане во пристаништето.
Станува збор за крузерот Амбишн на компанијата Амбасадор круз лајн, на кој имало 1233 патници, главно од Велика Британија и Ирска.
Здравствените власти потврдија дека починал 90-годишен патник, додека околу 50 лица покажале симптоми на норовирус.
Норовирусот е многу заразна форма на гастроентеритис што предизвикува повраќање и дијареја.
Бродот испловил од Шетландските Острови на 6 мај, а пред пристигнувањето во Бордо застанал во Белфаст, Ливерпул и Брест. По Бордо требало да продолжи кон Шпанија.
