Повеќе од 200 тони медузи се појавиле во близина на француската нуклеарна централа „Гравелин“, што довело до целосно исклучување на два од нејзините шест реактори, соопшти во четвртокот француската енергетска компанија EDF.
Медузите се појавиле во близина на системот за филтрација на пумпната станица која ја снабдува централата со морска вода. Од компанијата EDF соопштиле дека реакторите биле исклучени од претпазливост, со цел да се осигури дека големата концентрација на медузи на никаков начин нема да ја загрози безбедноста на постројката.
Другите два реактори работат со намалена моќност, додека преостанатите два исто така се надвор од функција, делумно поради планирано одржување и инспекции.
Во нуклеарната централа „Гравелин“ (Gravelines) и претходно имало проблеми во работата на реакторите поради големи јата медузи, како во текот на овој месец, така и во август минатата година.
Централата вовела системи за следење кои овозможуваат рано откривање и отстранување на големи јата медузи. Седум пловни објекти непрекинато работат во близина на постројката, ги собираат медузите и ги пуштаат понатаму на отворено море, изјави портпаролката на компанијата EDF.
Причините за појавата на толку голем број медузи засега не можат да се утврдат. EDF соработува со различни партнери со цел подобро да го разбере овој феномен.
Портпаролката нагласила дека инцидентот не претставува закана за француската електроенергетска мрежа.
„Гравелин“ е една од речиси 20-те француски нуклеарни централи и се наоѓа на северниот брег на Франција, приближно на половина пат меѓу Кале и Денкерк.
