Над 25.000 луѓе депортирани во трети земји преку тајни американски договори

Американската влада депортирала повеќе од 25.000 лица во трети земји врз основа на тајни договори со 35 држави, покажува меѓународна новинарска истрага објавена денеска.

Според истрагата на 72 новинари од 23 медиуми во 15 земји, координирана од конзорциумот „Forbidden Stories“, од враќањето на Доналд Трамп во Белата куќа во јануари 2025 година, Вашингтон склучил договори со земји од Латинска Америка, Африка и Пацификот за прифаќање странски државјани кои не можат законски да бидат вратени во нивните матични земји.

— реклама —

До 31 август 2026 година, најмалку 25.447 лица биле префрлени во 28 земји, од кои околу 20.000 во Мексико. За овие аранжмани американската влада издвојила најмалку 410 милиони долари, односно околу 357 милиони евра.

— реклама —

Условите се разликуваат од договор до договор, вклучително и во однос на националноста на лицата што може да бидат прифатени и дали се дозволува прием на лица со криминално досие. Според истрагата, Вашингтон контактирал со 49 од 54 африкански држави за да прифатат депортирани лица кои не се нивни државјани.

Најголем дел од преговорите и исплатите ги водела Канцеларијата за ремиграција при американскиот Стејт департмент, основана во мај 2025 година.

— реклама —

Меѓу договорите е и оној со Паалау, која прифатила да прими 75 државјани на трети земји во замена за 6,54 милиони евра. Досега таму биле испратени три лица.

Од предвидените средства, околу 70,6 милиони евра се наменети за владите потписнички, додека остатокот е предвиден за меѓународни организации, меѓу кои Меѓународната организација за миграција и УНХЦР.

Двете организации се соочија со критики поради прифаќањето американски средства. Од УНХЦР посочиле дека не се страна во договорите и дека средствата ги користат согласно својот мандат, додека од ИОМ нагласиле дека прифаќањето на средствата не значи поддршка на депортациите.