Директорот на ДЗС, Стојанче Ангелов, информира дека денеска се регистрирани околу 30 пожари на отворен простор, од кои најголем предизвик и натаму претставуваат пожарите во Мариово, над селото Рамни Габер кај Студеничани и над Драгов Дол во Општина Македонски Брод.
Најтешка била ситуацијата кај селото Крушевица, каде што поради силниот ветер огнот успеал да го премине асфалтираниот пат и да се приближи до селото. Со ангажман на локалното население, пожарникарите од Прилеп, тимовите на ДЗС, доброволните пожарникари и дополнителните екипи од Кавадарци, пожарот на овој крак е ставен под контрола.
За дополнителна сигурност, кон Крушевица се упатени екипи од Неготино и од скопската противпожарна бригада, а за првпат ова лето превентивно се ангажирани и околу 30 припадници на Армијата, чија задача е да помогнат во заштитата на селото доколку огнот повторно се приближи.
„Пред малку овде имаше вистинска драма. Одбраната на селото Крушевица беше многу тешка. Огнот успеа да префрли преку асфалтираниот пат каде што имавме концентрирана одбрана. Поради силниот ветер го загрози селото“, изјави Ангелов.
Пожарот во Мариово продолжува да се движи кон битолската страна, во правец на селото Орле. На терен се работи на создавање противпожарни пресеци, а ангажирани се пожарникари од Битола, полициски хеликоптер и воздухопловни трактори на ДЗС. Ангелов посочи дека гаснењето е отежнато бидејќи огнот повторно се активира на други делови од линијата.
Активен е и пожарот над селото Рамни Габер, на територијата на Општина Студеничани, кој се движи кон Китка. Во моментов не се загрозени населени места, но теренот е исклучително стрмен и непристапен, што значително ја отежнува интервенцијата.
Предизвик останува и пожарот над Драгов Дол во Македонски Брод. Иако претходно бил речиси целосно ставен под контрола, повторно се активирале дел од неговите краци.
Ангелов повторно упати апел до граѓаните да бидат крајно внимателни, особено поради најавите за дополнително зголемување на температурите и отсуството на врнежи.
„Нема потреба од паника. Наша основна цел е заштита на населените места. Досега успеваме во тоа“, порача директорот на ДЗС.
Тој повторно демантираше дека во Чаниште изгореле куќи во кои живеат жители, посочувајќи дека станува збор за стари и напуштени објекти, а можеби и за куќи што повремено биле користени.
