Засилена фреквенција на патници е регистрирана во изминатите 24 часа на граничните премини „Богородица“ и „Дојран“, при што повеќе од 17.000 лица ја напуштиле Македонија кон Грција, додека околу 16.000 патници влегле во државата, покажуваат податоците на Министерството за внатрешни работи.
Поради големиот број возила, во текот на денот се формираа долги колони на двата гранични премини, а најголем метеж беше забележан на „Дојран“, каде што колоната се протегаше низ Стар Дојран.
Според информациите од МВР, на граничниот премин „Богородица“, во периодот од вчера до денес напладне, во Македонија влегле 5.864 македонски државјани, а излегле 5.948. Во истиот временски период влез во државата оствариле и 10.249 странски државјани, додека 11.648 ја напуштиле земјата.
На граничниот премин „Дојран“ биле регистрирани 399 влезови и 1.104 излези на македонски државјани. Кај странските државјани, евидентирани се 1.295 влезови и 1.174 излези.
Од Министерството за внатрешни работи велат дека се ставени во функција сите расположливи човечки и технички капацитети за да се овозможи побрз проток на патниците, при истовремено спроведување на задолжителните гранични контроли.
