Над 750.000 профили избришани од Инстаграм и Фејсбук поради забраната за лица под 16 години во Австралија

Мета отстранила повеќе од 750.000 профили на Инстаграм и Фејсбук во Австралија поради сомнение дека зад нив стојат корисници помлади од 16 години.

— реклама —

Компанијата соопшти дека во периодот од декември до јуни деактивирала околу 462.000 профили на Инстаграм и 294.000 на Фејсбук. Мерките се преземени пред и по воведувањето на австралиската забрана за користење на социјалните мрежи од лица под 16 години.

Само во јануари Мета објави дека претходно отстранила 331.000 профили на Инстаграм и 173.000 профили на Фејсбук.

— реклама —

Забраната стапи во сила на 10 декември, а беше воведена поради загриженоста за влијанието на социјалните мрежи врз физичкото и менталното здравје на децата и младите. Мета соопшти дека сака да го почитува законот, иако претходно, заедно со други платформи, се спротивставуваше на неговото воведување.

— реклама —

Австралискиот регулатор за интернет во меѓувреме разгледува можност за преземање мерки против платформите за кои смета дека не презеле доволно активности за спроведување на забраната.

Владата ја зголеми и максималната казна за прекршување на законот на речиси 70 милиони американски долари, а на регулаторот му даде дополнителни овластувања за прибавување документи.

— реклама —

Сепак, податоците на австралиската влада и независни истражувања покажуваат дека мерката не го спречила користењето на социјалните мрежи во целост – повеќе од осум од 10 лица помлади од 16 години и понатаму ги користеле платформите во првите три месеци од забраната.