Нафтата над 105 долари: Разговорите меѓу САД и Иран ги разочараа пазарите

Цените на нафтата пораснаа на меѓународните пазари и достигнаа околу 106 долари за барел, откако трговците останаа разочарани од индиректните разговори меѓу САД и Иран за прекин на конфликтот и нормализирање на испораките преку Ормускиот Теснец.

На лондонскиот пазар цената на барелот попладнево беше повисока за 2,81 долар во однос на вчерашното затворање и достигна 105,89 долари. На американскиот пазар нафтата поскапе за 2,55 долари, на 94,71 долари за барел.

— реклама —

Пазарите во текот на неделата внимателно ги следеа изјавите од Вашингтон и Техеран за време на Генералното собрание на Обединетите нации, барајќи знаци за можно приближување кон решение на конфликтот.

Американскиот претседател Доналд Трамп изјави дека конфликтот нема да заврши пред изборите за Конгресот во ноември, по што, според него, Иран ќе мора да избира меѓу договор и разорна војна. Иранскиот претседател Масуд Пезешкијан, пак, порача дека неговата земја никогаш нема да попушти под американскиот притисок.

— реклама —

Специјалниот американски пратеник Стив Виткоф во вторникот објави дека американски и ирански претставници одржале долги индиректни разговори на маргините на Генералното собрание на ОН. Тој оцени дека циклусот разговори „успешно е завршен“, додека посредниците продолжуваат со работата.

Ирански висок функционер во средата за „Ројтерс“ изјави дека ставовите на Техеран и Вашингтон за завршување на конфликтот и натаму се спротивставени, но дека дипломатските напори мора да продолжат.

— реклама —

Според него, на разговорите било разговарано и за повторно отворање на Ормускиот Теснец, како и за укинување на американската блокада. Техеран претходно навести дека би можел да го отвори теснецот доколку Вашингтон го намали воениот притисок и ја укине блокадата на иранските пристаништа.

Физичкиот пазар на нафта сè уште е далеку од целосно нормализирање, оцени Пријанка Сачдева од „Phillip Nova“. Таа посочи дека цените на нафтата во Лондон и понатаму го вклучуваат дополнителниот геополитички ризик, како и повисоките транспортни трошоци, бидејќи меѓународниот пазар е директно изложен на нарушувања на Блискиот Исток и во Ормускиот Теснец.

Американскиот пазар, според неа, се наоѓа во нешто подобра положба поради релативно изолираните домашни извори на снабдување.

Во меѓувреме, одделните податоци на Организацијата на земјите извознички на нафта (ОПЕК) покажаа дека во средата барелот од кошницата на нафтата на земјите членки поевтинел за 1,50 долари и се продавал за 107,69 долари.