Нафтата поскапе по американскиот напад врз ирански ракетни лансери

Цените на нафтата забележаа раст на почетокот од неделата, поттикнат од зголемените стравувања дека конфликтот на Блискиот Исток може дополнително да го наруши снабдувањето со енергенси.

Фјучерсите за сурова нафта „Брент“ за испорака во ноември пораснаа за 1,54 отсто, на 89,46 долари за барел, додека фјучерсите за американската нафта „Вест Тексас Интермедијат“ за октомври се зголемија за 1,44 отсто, на 84,60 долари за барел.

— реклама —

Растот следува откако американските сили во неделата нападнаа два ирански ракетни лансери на островот Ларак. Според американската Централна команда, припадници на Корпусот на Исламската револуционерна гарда биле забележани како се подготвуваат да лансираат ракети опремени со поморски мини во Ормускиот Теснец.

„Можам да потврдам дека американските сили нападнаа два ирански лансери на островот Ларак“, изјави капетанот Тим Хокинс, портпарол на Централната команда на САД.

— реклама —

Според „Асошиејтед прес“, станува збор за прв јавно потврден американски напад врз ирански позиции од крајот на јули.

— реклама —

Од Корпусот на Исламската револуционерна гарда соопштија дека во нападот биле убиени и ранети неколку ирански војници. Иранската страна, според тамошните медиуми, возвратила со напади врз американски воени бази во Јордан.

Дополнителна загриженост предизвикува состојбата со бродскиот сообраќај низ Ормускиот Теснец, еден од најважните поморски коридори за глобалното снабдување со енергенси. Конфликтот на Блискиот Исток веќе сериозно го нарушува сообраќајот низ ова подрачје.

Аналитичарот Тамас Варга од PVM Oil Associates оцени дека ризиците за снабдувањето ќе продолжат и оти количините на нафта би можеле дополнително да се намалуваат во наредните недели и месеци.

Дополнителен притисок врз пазарот создаваат и нападите врз рафинерии на Блискиот Исток и во Русија, кои според „Голдман“ го ограничуваат и онака затегнатиот глобален капацитет за преработка на нафта.