Цената на нафтата на светските берзи продолжува да расте, при што барелот надмина 94 долари и го достигна највисокото ниво во последните три недели. Инвеститорите стравуваат дека застојот во преговорите за прекин на војната на Блискиот Исток може дополнително да го наруши снабдувањето со нафта од регионот на Персискиот Залив.
На лондонскиот пазар цената на барелот достигна 94,42 долари, што претставува раст од 2,80 долари, додека на американскиот пазар нафтата поскапе за 1,84 долари и се тргуваше по 87,67 долари за барел.
На двата пазари ова е највисоко ниво од 24 јуни, а цените растат петти ден по ред.
Аналитичарот на UBS, Џовани Стауново, оцени дека тензиите на Блискиот Исток остануваат високи и дека постои ризик од нови нарушувања во снабдувањето. Според него, намалениот извоз од регионот повторно го ограничува снабдувањето на глобалниот пазар.
Дополнителен притисок врз пазарите предизвика и одлуката на Обединетите Арапски Емирати да ги суспендираат сите финансиски и економски трансакции со Иран до натамошно известување.
Во фокусот останува и Ормускиот Теснец, преку кој пред почетокот на американско-израелскиот напад врз Иран кон крајот на февруари се транспортираше околу една петтина од светските количини на нафта и течен природен гас. Сегашниот обем на транспорт, според достапните податоци, е значително понизок во споредба со периодот пред почетокот на војната.
Дополнително, американското Министерство за енергетика соопшти дека залихите на дестилирани горива, вклучително и дизелот и мазутот, минатата недела се намалиле трет пат по ред. Од друга страна, комерцијалните залихи на сурова нафта неочекувано пораснале за 4,4 милиони барели.
Според податоците на ОПЕК, цената на барел од кошницата на нафтата на земјите-членки во средата изнесувала 91,27 долари, што е зголемување од 2,30 долари во однос на претходниот ден.
