Цената на нафтата силно порасна во четвртокот, при што барелот „брент“ за првпат од мај достигна 105 долари. Новата ескалација на конфликтот на Блискиот Исток дополнително ги потресе глобалните финансиски пазари.
Цените на нафтата оваа недела повторно се искачија над 100 долари за барел поради засилените борби во Ормускиот Теснец и Црвеното Море. САД и Иран разменуваат напади, додека јеменските Хути, кои имаат поддршка од Иран, извршија напади врз Саудиска Арабија, зголемувајќи ги и ризиците околу теснецот Баб ел-Мандеб.
Нафтата „брент“ и американската лесна нафта во четвртокот поскапеа за повеќе од четири отсто, по што цените благо се намалија. Американската нафта достигна 100 долари за барел, исто така првпат од мај, а потоа се стабилизираше околу 99 долари.
На пазарите расте стравувањето од нарушување на глобалното снабдување, особено на транспортот на нафта низ Ормускиот Теснец. Поскапата енергија, воедно, го зголемува инфлаторниот притисок и ги засилува очекувањата за повисоки каматни стапки.
„Засилените напади во Ормускиот Теснец и акциите на Хутите против Саудиска Арабија укажуваат дека Иран и неговите сојузници се обидуваат да ја преземат иницијативата во војната“, оцени Џејсон Туви од „Капитал економикс“. Според него, тоа може да го забави обновувањето на производството на нафта во Заливот и да го зголеми ризикот од дополнителен раст на глобалните цени на енергенсите во следните недели.
Дополнителен притисок има и на пазарот на обврзници. Приносот на 10-годишните американски државни обврзници се зголеми за девет базични поени, на 4,93 отсто, што е највисоко ниво од октомври 2023 година.
Растот на приносите се случи и покрај најавата на американското Министерство за финансии дека ќе откупи до шест милијарди долари обврзници со цел да се намали притисокот врз пазарот.
Инвеститорите стравуваат дека поскапувањето на енергенсите дополнително ќе ја поттикне инфлацијата и ќе ги принуди централните банки да ги задржат или зголемат каматните стапки. Проценките на трговците дека Федералните резерви би можеле да ги зголемат каматите следната недела пораснаа на 70 отсто, од 61 отсто еден ден претходно и 49 отсто пред една недела.
Американските берзански индекси паднаа четврти ден по ред. Индексот Си-ен-пи 500 се намали за 0,6 отсто, а во однос на рекордот постигнат на 13 август е во пад од повеќе од 2,5 отсто.
