Нафтата со најголем неделен пад од 2020 година, „брент“ се спушти под 91 долар

Цените на нафтата на светските берзи бележат остар пад, а европскиот референтен тип „брент“ се спушти на најниско ниво од крајот на август. Главна причина за ваквото движење се зголемените очекувања дека конфликтот меѓу САД и Иран би можел да заврши со дипломатски договор, со што би се намалиле ризиците за снабдувањето со нафта од Блискиот Исток.

— реклама —

Цената на „брент“ денеска падна на 90,99 долари за барел, што е дополнително намалување од 1,7 отсто, додека американската нафта ВТИ поевтини на 85,20 долари. Во претходната трговска сесија, „брент“ забележа пад од 5,85 отсто, на 92,57 долари, а ВТИ се намали за 4,38 отсто, на 86,85 долари за барел.

Падот е особено изразен во последните денови. Во текот на минатата недела цената на „брент“ се намали за околу 16 отсто, што претставува најголем неделен пад од почетокот на пандемијата во 2020 година.

— реклама —

Промената на расположението на пазарите следува по сигналите од Вашингтон дека САД засега нема да преземаат нови воени напади врз Иран доколку продолжат разговорите за завршување на конфликтот. Американскиот претседател Доналд Трамп изјави дека во моментов нема потреба од нови напади, но нагласи дека американските сили остануваат подготвени доколку ситуацијата се промени.

— реклама —

Пазарите очекуваат евентуален договор меѓу Вашингтон и Техеран да ги намали опасностите за транспортот на нафта низ Ормускиот Теснец, една од најважните светски поморски рути за снабдување со енергенси.

Сепак, неизвесноста не е целосно отстранета. Нападите врз бродови во регионот и натаму предизвикуваат загриженост, а аналитичарите предупредуваат дека подолгорочно намалување на цените ќе зависи од постигнување конкретен договор и нормализирање на поморскиот сообраќај.

— реклама —

Падот на цената на суровата нафта не значи дека горивата веднаш ќе поевтинат и на бензинските пумпи. На малопродажните цени влијаат и курсот на доларот, трошоците за транспорт и преработка, залихите, даноците и акцизите, како и времето потребно поевтината суровина да се одрази врз цените на готовите горива.