Европските купувачи на нафта се соочуваат со нов удар врз снабдувањето, откако Саудиска Арабија ги информирала за откажување на дел од септемвриските испораки на сурова нафта. Во исто време, привремено е запрено и товарењето на нафта во пристаништето Јанбу на Црвеното Море.
Поради прекинот, големите европски купувачи се принудени да бараат алтернативни извори на сурова нафта, додека цените на физичкиот пазар веќе надминаа 120 долари за барел.
Саудиска Арабија во петокот морала да го затвори и својот пустински цевковод Исток-Запад, кој во изминатите шест месеци бил главен начин за ублажување на последиците од блокадата на Ормускиот Теснец.
Ријад сега се обидува да го зголеми извозот преку таканаречени тајни пратки, начин на транспорт што веќе го користат Обединетите Арапски Емирати и Ирак.
Со ваквите пратки производителите од Заливот успевале да го одржат извозот на ниво од 7 до 9 милиони барели дневно, што претставува меѓу 30 и 40 отсто од количините што ги извезувале пред почетокот на конфликтот.
Нарушувањето на снабдувањето веднаш се одразило врз цените. Терминските договори за сурова нафта „брент“ се движеле близу 108 долари за барел, додека на физичкиот пазар во Европа цените биле уште повисоки. Референтната цена на „брент“ достигнала околу 122 долари за барел, покажуваат податоците на LSEG.
Според извори од трговци со нафта, меѓу најзасегнатите од застојот на испораките е полската нафтена компанија „Орлен“. Компанијата се обидува да обезбеди замена за саудиските пратки со сурова нафта од Северното Море и други пооддалечени региони.
„Арамко“ стана главен снабдувач на „Орлен“ во 2022 година, а денес покрива околу 40 отсто од потребите на компанијата. Тоа ѝ овозможило на Полска да ја намали зависноста од руската нафта, но истовремено ја изложило на поголема зависност од саудискиот производител.
„Орлен“ и нејзините подружници управуваат со рафинерии во Полска, Литванија и Чешка. Според податоците на аналитичката компанија „Кплер“, од почетокот на годинава полското пристаниште Гдањск на Балтичкото Море примило околу 160.000 барели саудиска нафта дневно, додека литванското пристаниште Бутинге примило околу 63.000 барели дневно.
