Најмалку 11 загинати во новиот руски напад врз Украина, погодена станбена зграда

Најмалку 11 лица загинаа во новиот голем руски воздушен напад врз повеќе украински градови, додека десетици други се повредени. Нападите биле изведени со различни видови ракети и беспилотни летала.

Најтешко е погоден градот Прилуки во Черниговската област, каде што руски проектил погодил станбена зграда. Според досегашните информации, загинале најмалку пет лица, а 26 се повредени, меѓу кои и пет деца. Спасувачките екипи продолжуваат со пребарување на урнатините поради можноста под нив да има уште луѓе.

— реклама —

Напад бил извршен и врз Киев, како и врз Дњепар, Александрија, Запорожје и Кременчук. Во Киев, градските власти соопштиле дека две лица загинале во населбата Дарница.

Првите експлозии во украинската престолнина биле регистрирани околу 3:15 часот по локално време, откако украинското воено воздухопловство предупредило дека кон границата се приближуваат руски бомбардери Ту-95. Околу два часа подоцна бил регистриран и втор бран напади.

— реклама —

Според украинското воено воздухопловство, руските сили користеле балистички и крстосувачки ракети, противбродски ракети и беспилотни летала.

До 10 часот по киевско време биле соборени или неутрализирани со електронско војување пет балистички ракети, како и 39 од вкупно 48 крстосувачки ракети. Од 130 руски нападни дронови, биле соборени или неутрализирани 117.

— реклама —

Украинските власти пријавиле погодоци од ракети и дронови на 18 локации. Во Киев бил погоден објект во нестамбена зона во населбата Оболон, додека во Подил биле оштетени магацински објекти.

Во Дњепар биле оштетени пет станбени згради, а во Кременчук четири повеќекатници. Во овие напади загинале уште две лица, а осум биле повредени. Во Запорожје била оштетена сообраќајната инфраструктура.

Украинскиот претседател Володимир Зеленски претходно ги повика граѓаните сериозно да ги сфатат предупредувањата за воздушна опасност и да реагираат на алармите, наведувајќи дека според разузнавачките информации Русија подготвува голем напад врз Украина.

Нападот се случи на денот кога рускиот претседател Владимир Путин го одбележува својот 74. роденден.