Најмалку 12 загинати во пакистански воздушни напади во Авганистан, меѓу жртвите 11 деца

Најмалку 12 лица, меѓу кои 11 деца, загинаа во пакистански воздушни напади во близина на границата меѓу Авганистан и Пакистан, соопштија авганистанските власти. Според портпаролот на талибанската влада, Забихула Муџахид, пакистанската армија во текот на ноќта го нарушила авганистанскиот воздушен простор и бомбардирала цивилни домови во покраините Кунар, Хост и Пактика.

— реклама —

Во нападите, покрај децата, животот го загубиле и една жена и еден постар маж. Локални извори наведуваат дека во округот Спера во покраината Хост бил погоден семеен дом, при што загинале девет лица, а десетмина биле повредени. Во друг напад во округот Бармал во Пактика, загинале уште три лица, меѓу кои имало и деца.

— реклама —

Пакистанската војска засега не ги коментираше обвинувањата. Нападите доаѓаат по период на релативно затишје во пограничниот регион, каде што претходно имаше жестоки судири меѓу двете земји.

— реклама —

Според податоците на Обединетите нации, во периодот од 1 јануари до 31 март годинава во вакви напади биле убиени најмалку 372 авганистански цивили.

— реклама —

Односите меѓу Исламабад и Кабул се влошени откако талибанците повторно ја презедоа власта во Авганистан во 2021 година. Пакистан го обвинува Авганистан дека им дава засолниште на борците на Техрик-е-Талибан Пакистан (ТТП), одговорни за бројни напади на пакистанска територија, што авганистанските власти категорично го негираат.