Најмалку 13 загинати во руски напад врз железнички перон во Украина

Најмалку 13 лица загинаа, а најмалку петмина се повредени во руски напад со дрон врз перон на железничка станица во украинскиот град Днипро. Во моментот на нападот на перонот имало патници кои чекале да се качат во возот за Запорожје, соопштија регионалните власти.

— реклама —

Руското беспилотно летало со млазен погон го погодило перонот непосредно до патничкиот воз број 866, кој сообраќал на линијата од Днипро кон Запорожје, објави украинската државна железничка компанија „Укрзализница“.

— реклама —

Иако била прогласена воздушна тревога поради зголемената опасност, на перонот имало голем број цивили. На местото на нападот интервенирале полицијата, спасувачките екипи и медицинските служби.

Нападот потсетува на трагедијата на железничката станица во Краматорск, во источна Украина, во април 2022 година, кога загина 61 лице, а повеќе од 160 беа повредени. Тогаш околу 4.000 цивили чекале евакуациски возови поради напредувањето на руските сили.

— реклама —

Станицата во Краматорск беше погодена на 8 април 2022 година со ракета „Точка-У“, за која се верува дека носела касетна муниција. Истрагата на непрофитната организација Центар за информациска отпорност утврдила дека достапните докази упатуваат на одговорност на Русија. Москва тогаш ја негираше вината и тврдеше дека нападот бил украинска провокација.