Најмалку 14 деца загинаа, а уште пет се повредени откако се урнал покрив на училишна зграда во Лахор, вториот по големина град во Пакистан, соопштија локалните власти и службите за итна помош.
Трагедијата се случила во округот Кахна Нау, во јужниот дел на Лахор. Според претставниците на службите за итна помош, повредените деца се пренесени во болница, додека бројот на загинати го потврди и министерот за здравство на покраината.
Полицијата соопшти дека во врска со несреќата веќе се приведени две лица, а истрагата за причините за уривањето е во тек.
Пакистанскиот премиер Шехбаз Шариф изрази жалење поради трагедијата и упати сочувство до семејствата на загинатите деца.
Уривањата на згради и покриви не се реткост во Пакистан, најчесто поради непочитување на безбедносните стандарди и употреба на неквалитетни градежни материјали.
Во јули минатата година, најмалку 27 лица загинаа, а 10 беа повредени кога се урна петкатна зграда во сиромашниот кварт Лијари во Карачи.
