Најмалку 18 загинати во тешка несреќа во Египет, повеќето биле тинејџери

Најмалку 18 лица загинаа во тешка сообраќајна несреќа во северен Египет, откако се судриле две товарни возила со кои биле превезувани земјоделски работници, јавува АФП.

— реклама —

Според неименуван извор, најголем дел од загинатите биле тинејџери на возраст од 13 и 14 години. Најмладата жртва имала само 10 години, објави локалниот весник „Ал-Масри ал-Јум“.

— реклама —

Несреќата се случила на пат во областа Исмаилија, во близина на Суецкиот Канал. Египетското Министерство за здравство првично соопштило дека во несреќата биле погодени 47 лица, од кои околу 30 биле повредени.

— реклама —

Патниците, главно жители на две села во делтата на Нил, патувале кон фарма каде што работеле. Ваквите товарни возила во Египет често се користат за превоз на милиони неформални работници, меѓу кои има и малолетници, иако превозот носи сериозни безбедносни ризици.

— реклама —

Детскиот труд останува сериозен проблем во Египет. Според официјалните податоци, најмалку 1,3 милиони малолетници работат во земјата, а децата често се изложени и на ризик од сообраќајни несреќи.