Најмалку 21 лице загинало, а десетици се повредени во тешка сообраќајна несреќа со автобус во јужниот дел на египетскиот Синајски Полуостров, соопшти египетското Министерство за здравство.
Несреќата се случила на патот меѓу туристичките места Дахаб и Нувеиба, на брегот на Црвеното Море. Автобусот од засега непознати причини излетал од патот и се превртел.
Во автобусот имало и поголем број државјани на Јордан. Јорданското Министерство за надворешни работи соопшти дека меѓу нив има загинати и повредени, но засега нема конечни податоци за нивниот број.
Според првични, неофицијални информации, автобусот најверојатно се движел со голема брзина, по што возачот изгубил контрола над возилото, кое излетало од патот и се превртело. Причините за несреќата допрва треба да бидат официјално утврдени.
Областа долж Црвеното Море е едно од популарните туристички подрачја во Египет и ја посетуваат голем број странски туристи.
Станува збор за уште една тешка сообраќајна несреќа во Египет. Минатиот месец во сообраќајна несреќа во провинцијата Исмаилија загинале 15 лица, а 32 биле повредени.
