Најмалку 34 рудари загинаа во експлозија што во четвртокот го погоди комплексот на рудник за јаглен во пакистанската покраина Балучистан, соопштија локалните власти.
Спасувачката операција сè уште е во тек, а екипите трагаат по уште двајца рудари кои останале затрупани под земја, изјави директорот за операции на Покраинската управа за управување со катастрофи, Мухамед Фахад.
Покраинскиот министер за рударство и минерални ресурси, Шоаиб Ношервани, претходно соопшти дека во моментот на несреќата во погодениот дел од рудникот се наоѓале 36 лица.
Според главниот покраински рударски инспектор, Мухамед Атиф, спасувачките екипи работат на длабочина од околу 1.200 метри за да стигнат до затрупаните рудари.
Регионалниот претставник за рударство, Абдул Гани Балоч, изјави дека силна експлозија на метан оштетила два меѓусебно поврзани рудника. Несреќата се случила во Соранг, оддалечена област во близина на Квета, главниот град на покраината Балучистан.
