Најмалку 34 загинати при превртување на мигрантски брод кај Сенегал, едно лице е спасено

Најмалку 34 лица загинале откако мигрантски брод се превртел во Атлантскиот Океан, во близина на брегот на Сенегал, додека пловел кон шпанските Канарски Острови. Едно лице било спасено, а бројот на исчезнати сè уште се утврдува, соопштило Министерството за внатрешни работи на Сенегал.

— реклама —

Несреќата се случила со мал дрвен чамец во морскиот простор меѓу главниот град Дакар и Сен Луис, на северот од земјата. Според основачот на сенегалското здружение за помош на мигрантите „Боза Фии“, Салиу Диуф, сите досега пронајдени тела се на сенегалски државјани, додека националноста на останатите патници сè уште не е позната.

Претседателот на Сенегал, Басиру Диомај Фаје, изрази сочувство на семејствата на загинатите и ги повика граѓаните да не ги ризикуваат животите на опасните поморски миграциски рути. Тој најави засилена борба против мрежите што организираат нелегални преминувања, но и активности за создавање подобри перспективи за младите во земјата.

— реклама —

Канарските Острови се главна влезна точка во Европа за мигрантите од Западна Африка. Според шпанската организација за права на мигрантите „Вокинг Бордерс“, од јануари до мај 2026 година на атлантската рута кон островите загинале 635 лица. Организацијата проценува дека на секои 100 мигранти кои успеале да стигнат до Канарските Острови, животот го загубило уште 21 лице.

— реклама —

Во меѓувреме, на шпанскиот остров Ел Хиеро е прогласена вонредна состојба поради големиот број пристигнувања. Од почетокот на ноември, со околу 30 чамци на островот пристигнале повеќе од 3.300 мигранти.

Сенегалските власти пред три дена пресретнале и друг брод со 142 мигранти кои се упатувале кон Шпанија. Меѓу нив имало 23 жени, две бебиња и уште две деца, а патниците биле државјани на Сенегал, Гамбија, Гвинеја-Бисао, Гвинеја и Нигерија.

— реклама —

Невработеноста и ограничените можности за работа се меѓу главните причини поради кои младите го напуштаат Сенегал. Според податоците на државната статистичка агенција, во вториот квартал од 2026 година речиси секој четврти млад човек во земјата бил невработен.