Најмалку 67 рудари загинаа во уривање на рудник за злато во западниот дел на Судан, а спасувачките екипи и понатаму трагаат по луѓе кои останале заробени под урнатините.
Несреќата се случила во рудникот Ал-Зара, во близина на градот Нухуд, во покраината Западен Кордофан. Подрачјето е под контрола на паравоените Сили за брза поддршка (РСФ), кои од 2023 година се во судир со суданската армија.
Според сведоштвата на преживеаните, рудникот се урнал доцна синоќа. Медицински извори предупредуваат дека бројот на жртвите може да се зголеми, бидејќи потрагата и спасувачката операција сè уште траат. Екипите се обидуваат да стигнат до евентуални преживеани и да ги извлечат телата на рударите заробени под одронот.
Рударот Ал-Амин Сулејман потврдил дека во рудникот сè уште има заробени луѓе. Еден од преживеаните, Хајрал-Сејд Габара, изјавил дека уривањето било од огромни размери и дека на местото немало механизација за отстранување на земјата.
Судан е меѓу најголемите производители на злато во светот, но несреќите во рудниците се чести поради ниските безбедносни стандарди.
Слични трагични несреќи имало и во изминатите години. Во уривање на рудник во 2023 година загинале 14 рудари, додека во 2021 година животот го загубиле 38 рудари.
