Најмалку четири лица загинаа, а 20 се повредени во израелските воздушни напади врз подрачјето на Набатије во јужен Либан, објави либанската државна новинска агенција ННА.
Во нападите била погодена и уништена болницата „Гандур“ во местото Ал-Набатије ал-Фаука, објект кој со години не бил во функција. Според информациите, има и повредени.
Силен воздушен удар бил извршен и во градот Набатије, каде цел била историска зграда во сопственост на братот на пратеникот Насер Џабер. Објектот во минатото бил ресторан, а по нападот е целосно уништен.
Нападите предизвикале голема материјална штета и на зградите на регионалното одделение за финансии и одделението за земјоделство во Набатије, кои се наоѓаат во близина на погодената локација. Оштетени се канцеларии, скршени се прозорци и врати, а документи и списи биле расфрлани низ просториите. Оштетени се и десетици продавници и кафулиња во околината.
Претходно израелската војска соопшти дека либанската група Хезболах со два дрона ги нападнала израелските војници во јужен Либан. Припадниците на Израелските одбранбени сили (ИДФ) собориле еден од дроновите, при што нема повредени војници.
Од ИДФ оценија дека нападот претставува сериозно прекршување на договорот за прекин на огнот меѓу Израел и Либан и соопштија дека поради тоа биле извршени напади врз цели во јужен Либан.
Израелскиот портал Ynet, повикувајќи се на безбедносни извори, објави дека болницата во Набатије не се користела и дека Хезболах наводно ја користел како база. Овие тврдења не можеле независно да бидат потврдени.
