Најмалку осум загинати во серија пукотници во САД за време на Ноќта на вештерките

Најмалку осум лица загинаа, а десетици беа повредени во серија пукотници што се случија во повеќе американски градови за време на викендот посветен на Ноќта на вештерките. Најмногу жртви има во Далас, во сојузната држава Тексас, каде што во три одделни престрелки загинале четири лица, а 15 биле повредени.

— реклама —

Најтешките инциденти се случиле во населбата Дип Елум, позната по баровите, рестораните и ноќните клубови. Трите пукотници се случиле во период од само еден час и 15 минути. Полицијата сè уште утврдува дали нападите се поврзани и кои биле причините.

— реклама —

Во Џексон, во сојузната држава Мисисипи, две лица биле убиени, а шестмина повредени при пукање во ноќен клуб за време на забава за Ноќта на вештерките. Меѓу загинатите се 20-годишен маж и 18-годишна девојка. Напаѓачите сè уште не се идентификувани.

Во Блумингтон, во Индијана, седум лица биле повредени во близина на универзитетскиот кампус, додека во Бирмингем, во Алабама, едно лице загинало, а осум биле повредени во две одделни пукотници по универзитетски натпревар во американски фудбал.

— реклама —

Пукотници биле пријавени и во Фајетвил, Њуарк и Блумингтон во Илиноис. Американските сојузни власти најавиле дека ќе ги претстават мерките што ги преземаат по нападите во Далас.

— реклама —

И покрај насилниот викенд, податоците на ФБИ покажуваат дека бројот на убиства во САД минатата година се намалил за 18 проценти, а вкупниот број насилни кривични дела за 9,3 проценти во споредба со претходната година.